براساس یک گزارش تازه، طالبان در امتداد مرز میان افغانستان و تاجیکستان گروه انصارالله را گماشته اند.
شدت درگیری‌ها در شمال و شمال شرق افغانستان، همکاری طالبان را با برخی گروه‌های افراطی ممنوع شده بیشتر ساخته.
بخش تاجیکستان رادیو اروپای آزاد/رادیو آزادی در یک گزارش تحقیقی دریافته که همکاری میان گروه طالبان و گروه انصارالله تاجیکستان اخیراً افزایش یافته است.
در این گزارش گفته شده که جنگجویان گروه انصارالله تاجیکستان در چندین ولسوالی مرزی میان افغانستان و تاجیکستان حضور دارند.
مومن احمدی تهیه کننده این گزارش تحقیقی می‌گوید که: "اسناد زیادی به دست ما رسیده که ثابت می‌سازد که جنگجویان تاجیکستانی کنترول پنج ولسوالی در ولایت بدخشان را بدست دارند. یکی از باشنده‌های یک ولسوالی سقوط یافته به دست طالبان به رادیو آزادی گفت که یک مرد تاجیکی‌الاصل بنام مهدی ارسلان بیرق طالبان را در یکی از پوسته‌های مرزی برافراشته است."
براساس این گزارش، جنگجویان تاجیکستانی در ولسوالی‌های کوف آب، شیکی، نسی، مایمی و خواهان ولایت بدخشان حضور دارند که رهبری آنها را مهدی ارسلان یک شهروند تاجیکستان به عهده دارد.
در گزارش همچنان آمده که نام اصلی مهدی ارسلان، محمد شریفوف است و او در حقیقت باشنده منطقه شرقی نورآباد تاجیکستان است.
فعالیت گروه انصارالله در داخل تاجیکستان ممنوع قرار داده شده و اعضای این گروه به اتهام تروریسم تحت تعقیب حکومت قرار دارند.
مقام‌های مرزی تاجیکستان گفته اند که آنها معلومات دریافته اند که جنگجویان به رهبری محمد شریفوف در مناطق مرزی این کشور مستقر شده اند.
به گفتۀ این مقام‌ها، آنها موجودیت حداقل ۲۰۰ شهروند تاجیکستان را در صفوف طالبان تثبیت کرده اند.
گروه طالبان پیش از این هم به داشتن روابط با دیگر گروه‌های افراطی در ولایت‌های مختلف متهم اند.
محمد حنیف اتمر وزیر خارجه افغانستان در اول جولای به نشست شورای امنیت سازمان ملل گفت که طالبان هنوز هم با شبکه القاعده پناه داده و در ضمن با لشکرطیبه، جنبش تحریک طالبان پاکستان و جنبش اسلامی ترکستان شرقی هم روابط نزدیک دارد.
محمد امیری معاون سخنگوی ریاست جمهوری افغانستان روز گذشته در مورد روابط طالبان با گروه‌های دیگر تروریستی چنین گفت: "گزارش شورای امنیت سازمان ملل متحد و سایر نهاد‌های بین‌المللی نشان می‌دهند که طالبان نه تنها روابط شانرا با شبکه القاعده، داعش و سایر گروه‌های تروریستی قطع نکرده بلکه در کنار هم در برابر مردم افغانستان می‌جنگند."
اما ذبیح‌الله مجاهد یکی از سخنگویان گروه طالبان ارتباط این گروه با القاعده و هرگروه تروریستی دیگر را رد می‌کند.
او می‌گوید: "اکنون هیچ شبکه خارجی و القاعده در اینجا وجود ندارد، و نه هم اینجا برایشان فرصت وجود دارد."
از سوی دیگر وزیر خارجه تاجیکستان ابراز نگرانی کرده که با آمدن پناهجویان افغان به این‌کشور ممکن اعضای گروه‌های شورشی هم داخل این‌کشور شوند.
خبرگزاری تاس روسیه روزگذشته به نقل از سراج‌الدین مهرالدین گزارش داده که گفته است، برای جلوگیری از این چالش‌ها به شرایط و اقدامات مشخص نیاز است.
