اتحادیۀ اروپا رهایی ۲۰ تن از بند طالبان را یک اقدام موثر برای اعتماد سازی این گروه با حکومت افغانستان می‌داند.
ماموریت اتحادیۀ اروپا در افغانستان دوشنبه (۲۵ حمل) در تویتر نوشت، این اقدام طالبان محدود اما نمادین است.
در این پیام گفته شده که رهایی زندانیان برای به اجرا گذاشتن تعهدات مهم است.
اتحادیۀ اروپا هم‌‌چنان می‌گوید، انتظار‌های بیشتر دارد تا چنین اقدام‌ها، مذاکرات بین‌الافغانی را نزدیک‌تر از هر زمان دیگر سازد.
طالبان روز یکشنبه (۲۴ حمل) گفتند که ۲۰ تن از نیرو‌های امنیتی افغانستان را از بند رها می‌کنند و آن‌ها را در ولایت کندهار به کمیتۀ بین‌المللی صلیب سرخ می‌سپارند.
اما تادین خان فرمانده پولیس کندهار روز دوشنبه در یک اعلامیه گفت، کسانی که رها شده اند، غیرنظامی اند و از پارسال وظایف شانرا در صفوف پولیس ترک کرده اند.
گفته می‌شود تا یک هزار نیروی امنیتی و غیر نظامی افغان در حال حاضر در بند طالبان بسر می‌برند.