ریاست جمهوری افغانستان می‌گوید، قرار است رئیس جمهور غنی ماه آینده میلادی به ترکمنستان سفر نماید.
شاه حسین مرتضوی معاون سخنگوی رئیس جمهور امروز در صحبت با رادیو آزادی گفت، رئیس جمهور غنی در جریان این سفر خط آهن بندر آقینه را نیز افتتاح می‌کند:
"در حاشیه نشست شانگهای رئیس جمهور افغانستان با رئیس جمهور ترکمنستان دیدار داشت و رئیس جمهور ترکمنستان از رئیس جمهور افغانستان دعوت کرد که به منظور افتتاح خط آهن بندر آقینه به ترکمنستان تشریف بیاورد تاریخ دقیق آن بعداً اعلان می‌شود."
وی همچنان گفت، افتتاح این پروژه برای وصل کردن افغانستان با کشورهای آسیایی میانه بسیار مهم است.